Nagpasidaan ang Philippine Coast Guard (PCG) kabahin sa posibleng pagkahulog sa mga nahibiling bahin sa rocket sa China ngadto sa katubigan sa Amihanang Luzon.
Sumala sa PCG, gikatakdang ilunsad sa China ang Jielong-3 rocket gikan sa Haiyang, Shandong Province tali sa alas 10:29 sa buntag hangtod alas 11:04 sa buntag (oras sa Pilipinas) karong Miyerkules, Agosto 5.
Base sa Philippine Space Agency (PhilSA), gipahibalo sa Coast Guard District North Eastern Luzon nga ang natumbok nga drop zone nahimutang sulod sa Exclusive Economic Zone (EEZ) sa Pilipinas.
Dugang pa niini, gilauman nga adunay mga bahin sa rocket nga mahulog sa Drop Zone 1, nga gibana-banang 94 nautical miles gikan sa Babuyan Island ug 143 nautical miles gikan sa Sta. Ana, Cagayan.
Matud pa sa ahensya, bisan og ubos ang risgo niini sa teritoryo sa Pilipinas, gihangyo ang tanang sakayan nga likayan ang mga natumbok nga drop zone sa maong adlaw ug ipahibalo dayon sa labing duol nga yunit sa PCG kon adunay makit-an o gidudahang mga tipik sa rocket.
