DAVAO CITY- Dili pa nakahatag ug tukmang oras o adlaw si PRO 11 Regional Director PBGen Nicolas Torre lll kung hangtud kanus-a sila magpabilin sa KOJC compound.
Hinuon, gipasalig niini ni nga sa higayon nga matuman na nila ang ilang misyon mobiya gilayon sila sa nahisgutang lugar.
Positibo si General Torre na naa gayud sa sulod sa compound ang ilang gipangita nga mao si KOJC founder Pastor Apollo Quiboloy, apan gitaguan lamang kini sa iyang mga miembro.
Sumala ni Torre migamit sila karon ug usaka device nga makahimo sa pag-detect ug heart beat sa tawo nga maoy ilang usa sa gamiton aron makaplagan si Quiboloy.
Gibutyag usab ni Torre nga dili lalim ang ilang gihimong pagpangita kang Quiboloy sulod sa 30 ka iktarya nga luna sa KOJC compound ug magpabilin dinhi ang libuan ka mga police gumikan kay naa pay daghang mga lawak nga kinahanglan nila usa -usahon sa pagsuta.
Pinaagi sa life detector test nadeskobrehan sumala pa sa kapulisan ang daghanang mga lawak nga gipoy-an sa mga kabataang miembro sa KOJC.
Gipamugos usab ni Torre nga dili makatulin sa ilang trabaho ang kapulisan gumikan kay ginababagan kini sa mga KOJC members sukwahi sa gipasiatab sa mga nahisgutan nga mokooperar sila.
