Aktibong misuporta kagahapong adlawa ang mga personahe sa Bravo Company, 27th Infantry (ACTION) Battalion ubos sa pagpanguna ni 2Lt. Eryj Jerl M. Dayote, Executive Officer, sa pagpahigayon sa usa ka medical mission ug libreng haircut activity sa Carmen Integrated School sa Brgy. New Carmen, Tugbok District, Dakbayan sa Davao.
Gipangulohan ang maong kalihokan sa Office of the Vice President (OVP) Mindanao Satellite Office pinaagi ni Regina Rose D. Tecson, sa pakigtambayayong sa administrasyon sa eskwelahan ug sa Barangay Local Government Unit sa New Carmen.
Tumong sa maong humanitarian activity ang pagduol sa mga batakang serbisyo sa panglawas ngadto sa komunidad, ilabina sa mga residente sa hilit ug kulang og akses nga mga lugar.
Pinaagi sa hiniusang paningkamot sa mga ahensya sa gobyerno, lokal nga opisyal, healthcare volunteers, ug mga stakeholder sa komunidad, nakadawat ang mga benepisyaryo og libreng konsultasyong medikal, batakang health assessment, ug uban pang serbisyong panglawas.
Atol sa kalihokan, gipakatag ang mga ACTION Troopers aron maghatag og seguridad, magmintinar sa kalinaw ug kahapsay, motabang sa pagdumala sa mga tawo, ug pagsiguro nga malinawon ug organisado ang tibuok programa.
Gibanabana nga kapin sa 350 ka mga benepisyaryo nga gilangkuban sa mga estudyante, ginikanan, senior citizens, ug mga residente sa Brgy. New Carmen ug kasikbit nga mga komunidad ang nakapahimulos sa maong kalihokan. Naghatag usab ang mga volunteer barbers og libreng serbisyo sa pagpamutol sa buhok.
Gipakita sa kalampusan sa maong aktibidad ang padayong paningkamot sa Philippine Army ug mga kaabag niini sa pagpalambo sa komunidad ug paglig-on sa relasyon tali sa militar ug sibilyan.
