DAVAO CITY – Gitin-aw karon sa City Health office sa Panabo City nga suspected cases pa lamang ang na-unang gika-report nga 36 ka mga kaso sa dengue sa ilang syudad.
Gikanayon ni Roviglo Amor C. Pantua, program coordinator sa Philippine Integrated Diseases Surveillance and Response sa Panabo city nga mihimo na sila ug hinugtanay nga mga lakang aron mapugngan ang pagdaghan pa sa ihap sa mga nataptan ug dengue sa ilang syudad.
Gipagawas sa nahisgutang nahensiya ang katin-awan human mipadayag ug kabalaka ang katawhan labot sa report sa Panabo City Health office nga adunay kapin sa 30 ka mga kaso karon ang ilang syudad nga gikatala sa mga bulan sa Enero ug bulan sa Pebrero.
Usa sa mga gihimong lakang karon sa Panabo CHO ang pagapahigayon ug lecture ngadto sa mga barangay functionaries, mga purok leaders ug uban pang mga barangay officials unsay angayang himuon aron malikayan nga makapangitlog ang mga lamaok nga nagdala ug dengue virus.
Lakip usab sumala pa sa gihimo sa CHO ang misting operation aron pagbungkag sa mga breedings grounds sa mga lamok sa matag barangay.
Kini ang gawas pa sa pagdasig sa mga residente nga batasanon ang kanunay nga pagpanglimpyo sa ilang palibot.
