Duha ka sunod-sunod nga sunog ang miigo sa mga residential area sa Agdao ug Bucana, Davao City, sulod sa duha ka adlaw, hinungdan sa dakong kadaot sa mga kabalayan ug pagpanghawa sa mga residente.
Nagsugod ang dakong sunog sa Sitio Bakal, Barangay Leon Garcia, Agdao District, pasado alas 5 sa hapon niadtong Oktubre 15. Paspas nga mikaylap ang kalayo ug misaka hangtod sa Task Force Alpha, ang ikaunom nga lebel sa alarma, nga nagkinahanglan og dugang pwersa sa pagresponde.
Gibana-bana nga 1,000 ka pamilya ang naapektuhan sa sunog, samtang padayon ang paglista ug pag-validate sa mga apektadong panimalay. Gikontrolar ang kalayo alas 8:49 sa gabii ug gideklarang fire out alas 1:20 sa kaadlawon pagkasunod adlaw. Wala pay gitaho nga namatay o naangol.
Pagkasunod adlaw, kagahapong adlawa, Oktubre 16, laing sunog ang miulbo sa Kasilak, Barangay 76-A Bucana, nga miabot sa ikatulong alarma sumala sa unang mga report. Mitubag sa insidente ang mga bombero gikan sa unom ka fire station, uban ang volunteer fire brigades ug Davao Central 911.
Wala pay kompletong detalye sa gidaghanon sa mga kabalayan nga nadaot, mga pamilyang naapektuhan ug hinungdan sa sunog sa Bucana. Nagpadayon usab ang pagsusi sa mga awtoridad sa kaswalti, hinungdan ug kadaot sa sunog sa Agdao.
Gihangyo ang mga otoridad na mag binantayon sa mga butang nga pwede mahimong hinungdan sa sunog, ilabina mga duol sa short circuit aron mapanalipdan ang pag ulbo sa kalayo.
