DAVAO CITY – Gikadismaya sa pamilya ug kampo sa Mangacop ang gipagawas nga resolusyon sa City Prosecutors Office mahitungod sa pagpusil-patay ni Dr. Marvin Rey Andrew Pepino ngadto sa Grade 9 student nga si Amierkhan Mangacop.
Kahinumduman nga nahitabo ang mangilngig nga insidente niadtong Hulyo 2, 2022 gawas sa usa ka bar sa may Tavera ning dakbayan.
Subay sa gipirmahang Joint Resolution sa City Prosecutors Office kagahapon, Hulyo 20, 2022, wala matud pay probable cause aron mapasakaan og kasong murder si Dr. Pepino inay kasong homicide lamang ang ipasaka batok sa nahisgutan.
Sa pikas bahin, dugang gipahayag sa pamilyang Mangacop nga nakurat sila sa kapaspas sa pag-release sa City Prosecutors’ Office sa resolusyon ug desisyon sa maong kaso.
Diin kahinumduman nga niadtong Biyernes lamang, Hulyo 15 ning kasamtangang tuig, gisumite sa NBI ang resulta sa ilang gipahigayong imbestigasyon.
Nanghinaut na lamang karon ang pamilyang Mangacop nga mao gayud kini ang proseso sa matag kaso ug dili kay tungod adunahan ug ma-impluwensyang indibidwal si Dr. Pepino.
Nasayran nga karong adlawa usab mao ang adlaw nga natawhan ni Pepino. Samtang sa pikas bahin, wala pa sab masayod ang pamilyang Mangacop paunsa hinumdumon ang birthday ni Amierkhan sa Hulyo 23, adlaw’ng Sabado.
Gawas pa niini, gikatakda pa sa pamilya nga maghisgot kauban ang ilang mga abogado alang sa mamahimo nilang sunod nga lakang.
BY BOMBO ALLIANNE SILAO
