Nasunog ang usa ka barko nga nagpalupad sa bandila sa Comoros samtang nakapundo sa territorial waters sa Romania, human sa mga taho sa bag-ong pag-atake sa mga drone sa rehiyon sa Black Sea.
Sumala kang Romanian Defence Minister Radu Miruta, pormal nang giimbestigahan kung drone ba ang miigo sa tanker nga Yara J, human usab sa sunod-sunod nga insidente sa pagsulod sa wala mailhing mga drone sa airspace sa nasud.Nahitabo ang insidente human usab gitaho ang pag-atake sa duha ka barko sa baybayon sa Bulgaria, diin ang usa niini hingpit nga nalunod.
Tungod niini, gipatawag sa gobyerno sa Bulgaria ang ambassador sa Russia.
Gipasanginlan usab ni Ukrainian President Volodymyr Zelenskyy ang mga drone sa Russia sa sunod-sunod nga pagpamomba sa mga sibilyang barko sa neutral waters.
Tungod sa nagkagrabeng hulga sa mga ruta sa patigayon ug enerhiya sa Black Sea, gisugdan na sa mga silingang nasud, lakip ang Bulgaria, Romania ug Turkiye, ang konsultasyon aron palig-onon ang seguridad sa mga barko ug mabantayan ang mga teritoryo ubos sa NATO ug European Union.
