Gimandoan ni Pangulong Ferdinand Marcos Jr. ang mga ahensiya sa pagpatuman sa balaod nga buhaton ang tanang angay nga lakang aron mapugngan ang pagsulod sa iligal nga mga kontrabando sa nasud, ilabi na ang iligal nga droga.
Gipasalig usab ni Palace Press Officer Usec. Claire Castro nga updated ang Presidente sa mga kalihokan ug kalamboan sa kampanya sa gobyerno batok sa iligal nga droga.
Matod ni Castro, kanunay nga naghatag og report ngadto sa Pangulo ang Department of the Interior and Local Government (DILG) ug ang Philippine Drug Enforcement Agency (PDEA), ilabi na sa mga operasyon nga may kalabotan sa pagkakumpiska sa iligal nga droga.
Gibutyag ni Castro nga dili angay magpakapabaya ang mga otoridad sa pagtuman sa ilang katungdanan, ilabi na sa pagsumpo sa mga sindikato sa droga ug sa pagpapanubag sa mga responsable subay sa balaod.
Ang pahayag sa Palasyo misunod sa pagkakumpiska sa 521 ka kilo sa shabu sa Laos, nga giugnay sa Sam Gor, usa ka transnasional nga sindikato sa droga.
Tungod niini, gikanayon sa administrasyon ang kamahinungdanon sa hugot nga pagpatuman sa balaod ug koordinasyon sa mga hingtungdang ahensiya aron mapugngan ang operasyon sa mga sindikato sa droga ug mapanubag ang mga nalambigit niini kon mapamatud-an ang ilang kalambigitan sa maong kalihokan.
