DAVAO CITY – Gipasabot ni Dr. Jordana Ramiterre, head sa Reproductive Health and Wellness Center (RHWC) nga ang pagsaka sa ihap sa mga natalang nataptan sa sakit nga HIV-AIDS sa dakbayan tipik lamang kini tungod sa ilang gipahugtan nga kampanya ug pagdugang sa ilang gipahimutang nga mga testing center ingon man treatment center sa siyudad.
Gikanayong mas daghanan na ang muadto sa ilang buhatan aron nga mopailalom sa eksaminasyon hinungdan nga misaka ang ihap niini.
Nasayran sa opisyal nga sa tibuok Davao region, adunay 3,857 ka kaso sa HIV-AIDS ang natala sukad Enero hangtud Hunyo ning kasamtangan nga tuig.
Sa nahisgutan nga ihap, mas taas ang natala sa Davao nga anaa sa 2,902 nga gilangkuban sa 157 ka mga babaye ug 2,745 ka mga lalaki.
Nasayran nga makighiusa ang dakbayan sa Davao sa kasaulogan sa World Aids Day karong Disyembre 1 ning kasamtangan nga tuig.
