Gibutyag sa Department of Education (DepEd) nga nagbilin ug mukabat sa P3.7 billion nga kantidad sa kadaot ang bagyong Kristine sa mga tulunghaan ug uban pang imprastraktura sa sektor sa edukasyon.
Subay sa pagbana-bana sa ahensya, anaa sa P2.9 billion ang gikinahanglan alang sa reconstruction ug mukabat sa P737.5 million ang gikinahanglan alang sa pag-repair sa mga nagubang building.
Isip tubag niini, gipalihok na sa DepEd ang rapid response effort aron makatabang sa pagtubag sa mga gikinahanglan sa mga estudyante ug magtutudlo homan miigo ang bagyo.
Gipahayag ni Education Secretary Sonny Angara, ang matag adlaw nga walay klase ang kawad-on sa makat-unan, hinungdan nga gi-una nila ang rehabilitation efforts aron mabalik sa normal ang education system sa labing dali nga panahon.
Naglusad na usab ang DepEd ug komprehensibong recovery plan nga tumong matabangan ang mga estudyante nga mapadayon ang ilahang pagtuon ug wala na ang kalangan.
Lakip na niini ang pag-ilis sa mga nagubang learning resources susama sa mga libro, computer packages ug uban pa.
