Gisusi ni Pangulong Ferdinand R. Marcos Jr. ang kapasidad sa Singapore sa paggamit sa nuclear technology atol sa iyang pagbisita sa Singapore Nuclear Research and Safety Institute o SNRSI kaniadtong Sabado, Oktubre 10, 2026 samtang padayon nga gitun-an sa Pilipinas ang nuclear energy isip alternatibong tinubdan sa kuryente.
Sumala sa Presidente, tumong sa maong pagtuon nga mapalig-on ang suplay sa elektrisidad ug makatabang sa pagpaubos sa bayrunon sa kuryente sa mga Pilipino, ilabina sa nagpadayon nga pagsaka sa presyo niini ug sa mga hagit nga dala sa climate change.
Atol sa pagbisita, gipahigayon ni SNRSI Chief Executive Officer Low Xin Wei ang briefing kang Marcos kabahin sa panukiduki sa institusyon sa nuclear technology ug sa mga lakang aron masiguro ang kaluwasan sa maong teknolohiya.
Gipahayag usab sa Presidente nga mas daghan na karon nga mga Pilipino ang bukas sa paggamit sa nuclear energy, ilabina kon hisgotan ang mga pamaagi sa pagsiguro sa kaluwasan niini.
Dugang pa niya, aduna usab mga propesyonal sa Pilipinas nga mahimong makatabang sa pagpalambo sa maong sektor, lakip ang mga adunay kahibalo ug kasinatian gikan sa nangaging mga paningkamot sa nasod sa nuclear power.
Sa kasamtangan, anaa na sa unang duha ka hugna sa pagpangandam ang Pilipinas alang sa posibleng paggamit sa nuclear energy.
