Daghan tawo ang miabut aron makita ang P-pop girl group nga BINI sa ilang duha ka adlaw nga pagbisita sa Davao City niadtong weekend.
Gisugdan kini sa ilang pasundayag sa Aurora Music Festival nga gipahigayon sa Crocodile Park Grounds diin bisan pa sa ulan ug taas nga oras sa paghulat, nagpabilin gihapon ang mga fans aron makita ang grupo nga mao ang finale performer sa maong festival.
Sunod niini, mitambong ang grupo sa usa ka mall event sa Ecoland, Davao City niadtong Domingo, Oktubre 26, 2025, diin daghang mga fans ang miabot aron masuportahan ug makita ang grupo atol sa ilang panagtagbo sa Davao media.
Sa panag-istorya, gipakita sa BINI leader nga si Jhoanna ang ilang kalipay sa padayon nga pagsuporta sa mga taga-Davao ug sa kainit sa ilang pagdawat.
Samtang si Mikha, usa sa mga miyembro, mitandi sa ilang fandom nga Blooms ug sa mga lokal nga supporters nga nagpakita sa dakong suporta sa ilang grupo.
Nagpasalamat siya sa tanan nga nagpadayon sa pagtuo ug pagpakita og gugma sa BINI.
Gisaysay usab sa grupo nga nangandam na sila alang sa Coachella 2026, diin sila ang unang Filipino girl group nga motungha sa maong tanyag nga music festival sa Estados Unidos karong Abril 10 ug 17.
Si Mikha mitug-an nga excited sila nga ipakita ang mga local designs ug sinina sa international stage isip pagpasigarbo sa kultura ug talento sa mga Pilipino.
Samtang sa laing bahin, ang mga Bisaya nga miyembro nga sila Aiah ug Colet nagpaabot og mensahe sa mga nabiktima sa linog sa Davao Oriental ug Cebu.
Si Aiah, nga nakigduyog sa relief mission sa 7th Air Reserve Center sa lungsod sa Manay niadtong Oktubre 20, nag-ingon nga nalipay siya nga nakahatag og tabang ug nakakita mismo sa kalig-on ug positibong espiritu sa mga biktima.
Gipaabot ni BINI Aiah ang iyang mensahe sa mga naapektuhan sa linog, diin iyang giingon nga iyang giampo ang kalig-on ug kaluwasan sa tanan nga biktima.
Matod niya, dili lalim ang ilang kasinatian apan bisan pa sa kalisod, nakita niya nga nagpadayon gihapon ang mga tawo sa pagpakita sa ngiti ug paglaum.
Si BINI Colet sa laing bahin, mipahayag usab sa iyang pagbati human makakita sa usa ka video sa usa ka negosyante sa Cebu nga bisan naapektuhan sa linog, naghatag gihapon og libre nga paninda alang sa uban nga mas nagkinahanglan.
Giingon ni Colet nga usa kini ka ehemplo sa kaisog ug kadasig sa mga Bisaya nga bisan sa panahon sa kalisdanan, nagpabilin gihapon nga lig-on, mapasalamaton, ug nagtinabangay.
Sa pagkakaron, nagpadayon ang BINI sa ilang mga preparasyon alang sa sunod nilang mga concert ug internasyonal nga pasundayag, lakip na ang ilang Coachella debut, nga nagtimaan sa dakong milestone sa Filipino music industry.
Bisan asa sila moadto, padayon nga nagpasiga ang grupo sa garbo ug talento sa mga kabatan-onang Pilipino.
