Gipahunong ni NBI Director Melvin Matibag ang mga espekulasyon nga posibleng si Sen. Ronald “Bato” dela Rosa ang tuyo sa pag-adto sa mga operatiba sa NBI ug Presidential Anti-Organized Crime Commission kon PAOCC sa Davao City niadtong Agosto 14.
Matud ni Matibag, “bakal” ug dili “Bato” ang ilang giadto sa siyudad.
Gipasabot niini nga ang ilang presensya sa Davao may kalabotan sa hiniusang operasyon sa Davao Mighty Steel Corporation sa Brgy. Ilang, Bunawan District.
Sa maong operasyon, 174 ka Filipino nga trabahante ang naluwas gikan sa manufacturing plant.
Mitumaw ang mga espekulasyon bahin kang dela Rosa tungod sa warrant of arrest nga giisyu sa International Criminal Court kon ICC batok kaniya.
Nalambigit ang senador sa kaso sa crimes against humanity may kalabotan sa kampanya batok sa ilegal nga droga sa administrasyon ni kanhing Pangulong Rodrigo Duterte. | VIA BOMBO EROS PAJOTA
