Napasaakan na og kaso ang duha ka suspek nga nadakpan sa hiniusang buy-bust operation sa Barangay Sawangan, Mawab, Davao de Oro, niadtong gabii sa Oktubre 14, diin nasakmit ang gidudahang shabu ug kalibre .45 nga pistola.
Gipahigayon ang operasyon sa Davao de Oro Provincial Drug Enforcement Unit (DDOPDEU), Mawab Municipal Police Station ug Philippine Drug Enforcement Agency (PDEA) Region XI.
Giila sa mga otoridad ang mga suspek nga si alyas “Rakrak,” 37 anyos, ug usa ka 50-anyos nga babaye. Silang duha mga residente sa Pantukan, Davao de Oro.
Gawas sa gidudahang shabu ug pistola, narekober usab sa operasyon ang upat ka bala, magasin sa pusil, drug paraphernalia, buy-bust money, personal nga mga gamit ug usa ka utility van.
Karon, anaa na sa kustodiya sa kapulisan ang duha ka suspek human sila pasakaan og mga kaso may kalabotan sa giingong paglapas sa Republic Act No. 9165 o Comprehensive Dangerous Drugs Act of 2002, ug Republic Act No. 10591 o Comprehensive Firearms and Ammunition Regulation Act.
Padayon ang pagdumala sa kaso subay sa legal nga proseso, samtang ang mga alegasyon batok sa duha ka suspek kinahanglan pang husayon sa korte.
