Nagsaulog ang Naval Forces Eastern Mindanao o NFEM sa ika-35 nga founding anniversary niini pinaagi sa usa ka Thanksgiving Mass sa Our Mother of Perpetual Help Chapel, Naval Station Felix Apolinario sa Panacan, Davao City niadtong September 1.
Gipahigayon ang misa isip pagpasalamat sa mga panalangin, giya ug mga kalampusan nga nadawat sa NFEM sulod sa 35 ka tuig nga pagserbisyo sa nasud.
Nahimo usab kining higayon aron mahinumduman ang mga sakripisyo ug kontribusyon sa mga lalaki ug babaye nga kaniadto ug karon nagserbisyo sa maong command.
Gipasiugda sa selebrasyon ang ilang dedikasyon, propesyonalismo ug padayong commitment sa pagpanalipod sa maritime interests sa nasud.
Lakip usab sa papel sa NFEM ang pagtabang sa pagpalig-on sa kalinaw ug seguridad sa Eastern Mindanao, ilabina sa mga baybayon ug katubigan nga sakop sa ilang area of responsibility.
Sa pagsaulog sa ika-35 nga anibersaryo, gipakita sa command ang padayon nilang pagtutok sa ilang mandato ug serbisyo.
Gilauman usab nga magpadayon ang NFEM sa pagpalig-on sa maritime security ug suporta sa mga operasyon sa Philippine Navy sa Eastern Mindanao.
Gipasidunggan usab sa selebrasyon ang tanang personnel nga padayong nagserbisyo alang sa nasud.| VIA BOMBO EROS PAJOTA
