Patay ang usa ka 32-anyos nga motorcycle rider human kini matanggong sa natumbang nga kable sa kuryente sa Sitio Baliwagan, Barangay Cabagayan, Tarragona, Davao Oriental niadtong Agosto 11, 2026.
Giila sa kapulisan ang biktima nga si Jayson Catundag Batonon, 32-anyos ug empleyado sa usa ka motorcycle company.
Sumala sa report sa Tarragona Municipal Police Station, nadawat nila ang impormasyon kabahin sa maong insidente mga alas-5:45 sa buntag.
Base sa inisyal nga imbestigasyon, nagsakay og motorsiklo si Batonon ug nakaabot sa usa ka blind curve diin wala niya namatikdan ang nahulog nga kable sa kuryente nga mitabok sa dalan human matumba ang poste.
Natanggong siya sa kable ug nahulog sa konkreto nga dalan, hinungdan sa grabeng kadaot sa ulo ug lawas.
Gidala dayon siya sa Tarragona Municipal Health Center apan gideklarar nga dead on arrival sa doktor.
Aduna usab laing rider nga nasamdan sa laing insidente nga may kalabotan sa nahulog nga poste sa parehas nga lugar ug gidala sa ospital alang sa pagtambal.
Padayon ang imbestigasyon sa mga awtoridad aron matino ang hinungdan sa pagkahugno sa poste ug ang mga sirkumstansya nga mitultol sa maong mga aksidente.
Gipahimangnoan usab ang mga motorista nga magmatngon ilabina sa mga lugar nga adunay posibleng peligro sama sa nahulog nga kable o mga babag sa dalan. | VIA BOMBO EROS PAJOTA
