Gikumpirma sa Civil Aviation Authority of the Philippines (CAAP) ang kahandam sa mga tugpahanan sa nasud alang sa pag-abot sa mga pangulo ug delegado nga miyembro sa ASEAN.
Matud ni CAAP Public Information Officer Bea Bernardo, andam ang ilang ahensya sa pagtabang sa mga lider nga mutambong sa 49th ASEAN Summit. Gidasig usab ang mga pasahero nga susihon daan ang ilang mga iskedyul sa biyahe aron malikayan ang aberya. Nagbutang usab og mga help desk sa mga airport alang sa mga pasaherong naapektuhan sa pag-usab o pagkansela sa mga flight.
Giklaro sa CAAP nga normal nga pagsusi sa seguridad ang ipatuman sa mga tugpahanan ug walay planong pagsira sa mga kalsada.
Samtang, nagpakuyanap ang Philippine National Police-Highway Patrol Group (PNP-HPG) og 716 ka personnel nga magsilbing escort sa mga lider ug delegado nga motambong sa maong panagtigom.
Lakip sa ilang eskortahan ang mga pangulo sa nagkadaiyang nasud, pamilya sa mga ministro, ug mga langyaw nga representante sa media. Gamiton ang dagkong motorsiklo sa pag-escort sa mga head of state, samtang gagmayng motorsiklo alang sa ubang delegado.
Isip kabahin sa pagpangandam, gisusi usab sa HPG ang mga motorsiklo nga gamiton sa operasyon, diin 72 niini ang gipahapsay aron masiguro ang ilang kahandam alang sa ASEAN Summit.
