Gia-awhag sa Philippine Rice Research Institute o PhilRice ang publiko nga magsugod sa pagkaon og mas gamay nga bahin sa kan-on, sama sa tunga sa tasa matag kaon, aron malikayan ang pag-usik sa bugas.Kabahin kini sa adbokasiya sa ahensya isip pagsaulog sa National Rice Awareness Month karong Nobyembre.
Base sa datos sa Department of Agriculture, gibanabanang halos duha ka kutsara nga kan-on ang mausik sa matag Pilipino kada adlaw, nga katumbas sa mokabat sa 9.69 ka kilo matag tuig.Sa kinatibuk-an, mokabat usab sa 542,477.6 metric tons nga bugas ang mausik kada tuig sa tibuok nasud.
Katumbas kini sa gidaghanon sa bugas nga mahimong ikapakaon sa halos 5.17 milyong Pilipino sulod sa usa ka tuig.
Giawhag usab sa PhilRice ang publiko nga suportahan ang lokal nga mga mag-uuma pinaagi sa pagpalit og lokal nga mga produkto sa bugas.
Gidasig usab sa institusyon ang mga Pilipino nga mopili og mas masustansiyang klase sa bugas isip kabahin sa pagmintinar sa hustong nutrisyon ug pagtabang sa pagsulbad sa problema sa malnutrisyon sa nasud.
