Giklaro sa Department of Justice (DOJ) nga dili awtomatikong nagpasabot nga sad-an na si Pastor Apollo Quiboloy human pormal nga gisang-at sa korte ang petisyon sa Estados Unidos alang sa iyang extradition.
Matod sa DOJ, lahi nga proseso ang extradition gikan sa pagtino kung sad-an ba o inosente ang usa ka tawo sa mga kasong giatubang niini.
Gipasabot sa kagawaran nga ang extradition dili usa ka criminal proceeding tungod kay kini gitawag og sui generis o usa ka talagsaon ug kaugalingong matang sa proseso.
Dugang pa sa DOJ, ang pagdeterminar sa pagkasad-an o pagka-inosente ni Quiboloy magdepende sa desisyon sa korte sa nasud diin siya dad-on.
Niadtong Nobyembre 9, pormal nang gisang-at sa DOJ sa Makati Regional Trial Court ang petition for extradition batok sa pastor.
Lakip sa mga kasong giatubang ni Quiboloy sa Estados Unidos ang international human trafficking, sex trafficking, conspiracy ug bulk cash smuggling.
Kahinumdoman nga sumala ni Chief State Counsel Dennis Chan, atol sa pag-andam pa lamang sa extradition petition, dili angay nga ipahamtang kang Quiboloy ang pinakabug-at nga silot kon matuman ang iyang extradition ngadto sa Amerika.
Gawas kang Quiboloy, gipangayo usab sa Estados Unidos nga ma-extradite ang iyang mga kaubang respondents nga sila Teresita Dandan ug Helen Panilag.
