Nanumpa isip bag-ong pangulo sa Ministry of Basic, Higher and Technical Education (MBHTE) sa Bangsamoro Autonomous Region in Muslim Mindanao (BARMM) si Member of the Parliament Naguib Sinarimbo atubangan ni Chief Minister Abdulraof Macacua.
Gisaad ni Sinarimbo nga pauswagon ang resulta sa pagkat-on sa mga estudyante ug tukoron ang sistema sa edukasyon nga motubag sa panginahanglan sa matag magtutungha, aron walay batang mabiyaan tungod sa kakabos, kalayo sa lugar o uban pang kalisdanan.
Gipasiugda niya nga ang kalampusan sa edukasyon dili angay masukod lamang sa pagtuman sa administratibong kinahanglanon, kondili sa kahibalo ug kahanas nga maangkon sa mga estudyante. Matod niya, responsibilidad usab kini sa mga ginikanan, lokal nga panggamhanan, magtutudlo ug komunidad, dili lamang sa MBHTE.
Samtang, gipunting ni Sinarimbo ang datos sa Second Congressional Commission on Education o EDCOM 2 nga nagpakita sa dakong hagit sa edukasyon sa BARMM.
Base sa assessment sa school year 2025-2026, mokabat sa 25.5 porsyento sa mga tinun-an sa Grades 1 hangtod 3 sa rehiyon ang naglisod sa pagbasa, ang pinakataas nga porsyento sa tibuok nasud.
Naa sa 64.7 porsyento ang functional literacy rate sa BARMM, ubos sa 69 porsyentong national average. Samtang 6.6 porsyento lamang ang cohort survival rate, nga nagpasabot nga mga pito sa matag 100 ka estudyante nga mosulod sa elementarya ang makakompleto og kolehiyo.
Dugang pa ni Sinarimbo, ang kahibalo sa mga Grade 6 pupil sa BARMM katugbang lamang sa lebel sa Grade 2 nga mga estudyante sa ubang bahin sa nasud.
Gipasalamatan niya si Macacua sa pagtugot kaniya nga magpatuman og dagkong reporma sa edukasyon, ug gipasiugda ang panginahanglan sa lig-on nga pagpangulo ug hiniusang paningkamot aron mapalambo ang kaugmaon sa katawhang Bangsamoro.
