Gisaway ni Ombudsman Remulla ang alegasyon nga adunay kaugalingong katabang si kanhi House Speaker Romualdez sulod sa prisohan
Kusganong gisaway ni Ombudsman Jesus Crispin ‘Boying’ Remulla ang gikatahong pagkabaton og kaugalingong katabang ni kanhi House Speaker Martin Romualdez sulod sa prisohan.
Matod ni Remulla, gidili ang maong klase sa kahikayan sulod sa bilanggoan ug dili kini tugotan kon tinuod man ang maong alegasyon.
Apan, susihon ug kumpirmahon una sa Ombudsman ang impormasyon kalabot sa gikatahong personal assistant ni Romualdez sulod sa iyang detensyon.
Kahinumdoman nga una nang miangkon si New Quezon City Jail Male Dormitory Warden Supt. Maria Lourdes Pacion atubangan sa Sandiganbayan bahin sa gikatahong presensya sa maong kaugalingong katabang.
Gipasiugda ni Remulla nga kon mapamatud-an ang pagkalambigit sa mga opisyal, dili siya magduhaduha sa pagtangtang kanila sa serbisyo.
Miangkon usab ang Ombudsman nga karon pa niya nadungog ang impormasyon bahin sa pagkabaton og kaugalingong katabang sulod sa prisohan.
Aron personal nga masusi kon adunay mga iregularidad sa pasilidad, gipahibalo ni Remulla ang iyang plano nga magpahigayon og kalit nga pagbisita o inspeksyon sa mga bilanggoan.
Pokus sa maong inspeksyon ang pagsusi kon adunay pinasahi nga pagtratar sa pipila ka mga piniriso, ug ang pagpapanubag sa mga opisyal nga nalambigit ug nagtinabangay sa maong mga iregularidad.
