Gikumpirma sa National Privacy Commission (NPC) niining adlaw nga Martes, Nobyembre 10, nga nakadawat kini og mga pahibalo kalabot sa paglapas sa seguridad sa personal nga datos gikan sa napulo ka ahensya sa gobyerno.
Lakip sa mga ahensiyang naapektuhan mao ang Department of Information and Communications Technology (DICT), Department of Labor and Employment (DOLE) pinaagi sa Bureau of Local Employment, Bureau of Internal Revenue (BIR), ug Philippine Amusement and Gaming Corporation (PAGCOR).
Apil usab ang Department of Justice (DOJ) pinaagi sa Office for Alternative Dispute Resolution, Securities and Exchange Commission (SEC), Department of Trade and Industry (DTI), Department of Science and Technology – Philippine Institute of Volcanology and Seismology (DOST-PHIVOLCS), Presidential Commission on Good Government (PCGG), ug Philippine Coast Guard (PCG).
Matod sa NPC, gisugdan na niini ang imbestigasyon sa gitaho nga pagtagas sa personal nga mga datos sa maong mga ahensya.
Gipasabot ni NPC Deputy Privacy Commissioner ug Spokesperson Atty. Jose S. Belarmino II nga susihon sa ilang Compliance and Monitoring Division ang matag pahibalo nga ilang madawat.
Lakip sa ilang susihon ang kinaiya ug mga kahimtang sa nahitabong insidente, posibleng epekto niini sa mga apektadong indibidwal, ug ang mga lakang nga gihimo sa may kalabotang ahensya.
Gidugang ni Belarmino nga bisan pa man og responsibilidad sa komisyon ang pagpangulo sa pagpanalipod sa personal ug sensitibong mga datos, katungdanan gihapon sa matag ahensya sa gobyerno ang pagsiguro sa kaluwasan sa mga datos nga anaa sa ilang kustodiya aron malikayan ang posibleng pagpahimulos sa mga apektadong indibidwal.
Gipasiugda usab sa NPC nga ang mga ahensya, isip personal information controllers, adunay tulubagon sa pagpanalipod sa personal nga mga datos nga anaa sa ilang pagdumala, bisan pa og ang pagtipig o pagproseso niini gi-outsource ngadto sa mga third-party service provider o subcontractor.
Obligasyon usab sa mga ahensya ang pagpatuman sa angay nga mga polisiya sa organisasyonal, pisikal, ug teknikal nga seguridad aron mapanalipdan ang personal nga impormasyon.
Samtang, gipahimangnoan sa komisyon ang publiko nga magmatngon batok sa phishing, mga scam, identity theft, ug uban pang pamaagi sa pagpangilad nga mahimong gamiton sa mga kriminal aron pahimuslan ang posibleng impormasyon nga nakuha gikan sa data breach.
Gidasig ang publiko nga dili motubag sa mga kuwestiyonableng mensahe, dili mo-click sa mga link gikan sa dili pamilyar nga mga website, dili mag-download og mga kadudahang attachment, ug dili basta-basta mohatag sa personal ug sensitibong impormasyon.
Nagsaad usab ang NPC nga padayon nilang bantayan ang mga taho kalabot sa data breach ug siguruhon ang pagtuman sa ilang mandato ubos sa Republic Act No. 10173 o Data Privacy Act of 2012.
