Naggahin ang Department of Budget and Management o DBM og kinatibuk-ang ₱82.9 bilyon alang sa year-end bonus ug cash gift sa mga kwalipikadong kawani sa gobyerno ning tuiga.
Ubos sa maong benepisyo, makadawat ang matag kwalipikadong empleyado og bonus nga katumbas sa usa ka bulan nga batakang sweldo, lakip ang ₱5,000 nga cash gift.
Gibutyag sa DBM nga ₱73.449 bilyon ang gigahin alang sa year-end bonus, samtang ₱9.549 bilyon ang alang sa cash gift.
Sumala kang DBM Secretary Kim Robert C. De Leon, gipagawas na sa ilang departamento ang pondo ngadto sa nagkalain-laing ahensya sa gobyerno ug gilauman nga madawat sa mga kawani ang maong benepisyo dungan sa ilang unang sweldo sa Nobyembre.
Kwalipikado niini ang mga kawani nga nakaserbisyo og labing menos upat ka bulan o 120 ka adlaw sulod sa Enero 1 hangtod Oktubre 31, 2026, sa national o local government.
Gipasiugda ni De Leon nga dakong tabang ang maong benepisyo sa mga kawani ug sa ilang pamilya, ilabi na karong nagkaduol na ang panahon sa Pasko.
Dugang pa sa opisyal, usa usab kini ka paagi sa pag-ila ug pagpasalamat sa kakugi, dedikasyon ug padayong serbisyo sa mga kawani sa gobyerno alang sa katawhang Pilipino.
