Nasakmit sa Bureau of Customs–Ninoy Aquino International Airport (BOC-NAIA) ang 15.036 ka kilo sa gidudahang ilegal nga droga nga nagkantidad og ₱89.16 milyones gikan sa 12 ka abandonadong parcel sa usa ka bodega sa Pasay City kaniadtong Nobyembre 6, 2026.
Gikan sa Thailand, India, Estados Unidos, ug Netherlands ang maong mga padala. Lakip sa nasakmit ang 11.241 ka kilo sa gidudahang shabu, 1.563 ka kilo sa marijuana kush ug 2.232 ka kilo sa ketamine nga gitago sulod sa mga sinina, pagkaon, sudlanan ug uban pang gamit.
Ang operasyon gipangunahan sa BOC-NAIA uban sa Philippine Drug Enforcement Agency (PDEA) ug ubang ahensya sa gobyerno.
Pasiugda ni Customs Commissioner Ariel F. Nepomuceno ang kamahinungdanon sa hugot nga pagsusi sa tanang padala, lakip ang mga abandonadong parcel, aron mapugngan ang pagsulod sa ilegal nga droga.
Gisumite na sa PDEA Laboratory Service ang mga nasakmit nga substansiya alang sa laboratory examination ug kumpirmasyon. Padayon usab ang imbestigasyon aron mailhan ang posibleng mga nalambigit ug mapasakaan og tukmang kaso.
