DAVAO CITY – Usa ka gituohang eksplosibo ang nibusikad atbang sa usa sa imnanan sa Roman Diaz Street, Calinan, ning dakbayan bandang alas-11 sa gabii, Agusto 7.
Sumala pa sa mga nakasaksi, naalarma ang mga residente sa dihang mibusikad ang usa ka gidudahang granada dapit sa Emragila Restobar.
Sigon sa inisyal nga report, dunay usa ang patay ug tulo ang mga nangaangol human ang nahitabong pagbusikad lakip ang tag-iya sa bar ug mga kabanay niini.
Nasayran nga dead on arrival sa balay tambalanan ang usa ka Rominic Notarte, 31 anyos, welder nga taga-Tamugan nga gilagak ang patayng lawas sa usa ka punerarya sa Calinan.
Samtang giila ang laing tulo ka mga samdan nga sila Loribeth Ñocyeo, 50 anyos, taga-Tamugan; Rey Agliones, 32 anyos; ug Emilita Alegarme, 48 anyos.
Gipaalim na ang mga nasamdan nga residente sa SPMC samtang ginasuta pa sa mga otoridad ang angulong “Love Triangle” isip hinungdan sa maong insidente.
Anaa sab nga naglawig sa gipanghitaboan sila Davao City Police Office Director PCapt. Alberto Lupaz ug Davao City Mayor Sebastian Duterte.
Sumala pa sa inisyal nga imbestigasyon, dugay nang nakadawat og bahad sa kinabuhi ang tag-iya sa bag-ong imnananan nga gimuntar sa nasangpit nga lugar.
Una na sab kining naransak ang maong establisyemento ug posibleng usa lamang ang nagpanalipod sa pagpangawat ingon man pagpabusikad sa maong lugar.
Wala sab laing mga indikasyon nga usa ka klase sa IED kon improvised explosive device ang gipabusikad sa maong lugar.
Gipataas na ang seguridad sa maong dalan sa Calinan alang sa paglusad og halawom nga imbestigasyon.
