DAVAO CITY – Maka-alarma na sumala pa ang kahimtang karon sa mga kababayeng Pinoy sa nasud Italy gumikan sa nagpadayong hulga sa Coronavirus disease (COVID-19).
Kini gumikan kay gawas sa nabati nilang grabe nga diskriminasyon, nagka-taas na usab ang ihap sa mga nangamatay gumikan sa nahisgutang sakit.
Kini ang gibutyag ni Vivian Torres, lumad nga taga dakbayan sa Dabaw ug kapin 13 ka tuig nang nagpuyo sa Rome Italy. Sa pakighinabi sa Bombo Radyo-Davao, gikanayon ni Torres nga sa kasamtangan moabot na sa 2,706 ang gikatalang positibo nga kaso, diin sa maong ihap 107 na ang namatay ug 270 pa lamang ang nagmaayo.
Tungod niini, gimando na sumala pa sa kagamhanan sa Italy ang pagpasira sa tanang mga tulunghaan sa maong nasudf sugod karong adlawa Marso 5 hangtud Marso 15 aron hingpit nga mapugngan ang pagkuyanap sa makamatay nga virus.
Apektado na usab sumala pa ang ekonomiya sa Italy gumikan kay mi-ubos na pag-ayo ang ihap sa mga torista nga miabot sa maong nasud.
Tungod niini, daghang mga Pinoy ang nawad-an na usab karon ug trabaho human nanirado ang pipila ka mga hotels ug uban pang mga establisamento.
Na-una na usab nga gipatuman ang travel van sa Italy batok sa tanang mga Asian airline company. Bisan sa mga subway station mingaw na usab kaayo ug wala nay makita pang mga langyaw nga pasahero sa train.
Pipila usab sumala pa sa mga pinoy ang sekreto nga naga-stock ug daghang mga pagkaon isip pagpangandam kung ugaling moabot sa worst scenario.
Wala na usab sumala pay mapalit nga mga facemasks sa Italy ug kung naa man, alang lamang sumala pa kini sa ilang mga lungsuranon.
Bisan pa man niini, gipaningkamutan sumala pa ni Torres ug sa pamilya niini nga ipadayon ang na –andan ug normal nilang kinabuhi sa Italy.
Gawas kang Vivian, tua na usab nagpuyo sa Rome ang iyang tibuok pamilya diin diuha niya ka mga anak ug iyang bana naa nagtrabaho sa usaka hotel sa nahisgutang nasud.
