DAVAO CITY – Walay hunong karon ang Vices Regulation Unit (VRU) sa paglusad ug operasyon batok sa mga nakasupak sa gipatumang 24 oras nga liquor ban sa dakbayan sa dabaw.
Gikanayon ni Dr. Ashley Lopez, head sa VRU naa na sa 250 ka mga operasyon na ang ilang gipahigayon kauban ang Davao city police office (DCPO).
Sukad gipatuman ang 24 oras nga liquor ban sa syudad sa dabaw niadtong Abril 7, 2020 naa na sa kapin usaka gatus ka mga tindahan ug indibiduwal ang nasikop sa VRU subay sa City Ordinance 004-131 o Liquor Ban Ordinance sa syudad diin adunay multa nga 3 mil pesos sa first offense ug 5 mil pesos usab sa mosulod nga mga kalapasan.
Dugang pa ni Lopez, kadaghanan sa mga nangadakpan mga gagmay nga tindahan sa tago nga mga lugar nga resulta sa mga sumbong nga gipaabot kanila sa mga concerned citizen pinaagi sa 911 ug sa Davao City Reports hotlines.
Samtang, sukad gipatuman ang MGCQ sa syudad niadtong July 1 nakarecord ang DCPO ug 119 ka mga tawo nga nadakpan gumikan sa kalapasan sa 24 oras nga liquor ban ug susamang gipangpasakahan na ug kaso.
