Dili moubos sa siyam (9) ka mga tawo ang nakabsan sa kinabuhi samtang 13 ang nasamdan human sa walay puas nga pagpamusil sa usa ka 13-anyos nga estudyante sa Kahramanmaras province sa habagatang Turkey.
Subay sa imbestigasyon, misulod ang Grade 8 nga estudyante nga suspek sa maong eskwelahan nga nagdala og mga armas nga gituohang iya sa iyang amahan nga kanhing pulis.
Gilayon nga misulod kini sa duha ka classrooms ug namusil sa mga biktima.
Nasayran nga adunay Lima ka pusil ug pito ka magazine ang dala sa suspek nga sa ulahi nakabsan usab sa kinabuhi, apan sa pagkakarton padayon ang gihimong imbistigasyon kung kini ba ang nagkutlo sa iyahang kaugalingong kinabuhi.
Sumala sa mga awtoridad, upat sa mga samaran anaa karon sa kritikal nga kondisyon, samtang ang unom ang naa sa intensive care unit. Pipila sa mga estudyante miambak usab gikan sa bintana sa eskwelahan aron makalikay sa pagpamusil.
Gi-report usab nga gidakop sa mga awtoridad ang amahan sa suspek samtang padayon ang imbestigasyon sa insidente.
Nahitabo ang pagpamusil usa ka adlaw human sa laing insidente sa pagpamusil sa laing eskwelahan sa Sanliurfa province diin 16 ka tawo ang nasamdan.
Mipahayag og pahasubo si Turkish President Recep Tayyip Erdogan ug mibutyag nga manubag ang bisan kinsa nga mapamatud-an nga nagpabaya sa maong makaluluoy nga panghitabo.
