Target sa Philippine National Police (PNP) nga mas pahugtan ang kampanya kontra ilegal nga droga sulod sa mga eskwelahan nga dili lamang alang sa mga estudyante, apan lakip usab ang mga magtutudlo ug staff human madakpan ang usa ka “school principal” sa usa ka buy-bust operation sa Surigao del Sur ug sa Davao Oriental.
Sumala kang PNP Chief Gen. Jose Melencio C. Nartatez, Jr., dako kaayo ang kabalaka sa pagkalambigit sa usa ka opisyal sa eskwelahan sa iligal nga droga, tungod kay sila unta ang nag-una sa paggabay sa mga kabatan-unan.
Kahinumduman nga nadakpan ang 45-anyos nga suspetsado, usa ka District 1 School Supervisor ug Principal III, sa magkahiusa nga operasyon sa PNP ug Philippine Drug Enforcement Agency (PDEA) sa Tagbina, Surigao del Sur niadtong Marso 20.
Nakumpiska kaniya ang ginaduda nga shabu nga nagkantidad og ₱6,800 ug ang gigamit nga buy-bust money.
Isip tubag sa insidente, gibutyag ni Nartatez nga makig-koordinar ang PNP sa Department of Education (DepEd) aron maghimo og mas hugot nga preventive education alang sa mga miyembro sa faculty.
Gipahimangnoan usab ni Nartatez ang tanang kawani sa gobyerno nga dili malambigit sa iligal nga droga, ug gimando ang ilahang operating unit nga siguruhon nga lig-on ang kaso batok sa nadakpan nga principal.
Kahinumduman usab nga niadtong Marso 2, napuhag sa mga operatiba sa Philippine Drug Enforcement Agency (PDEA) Regional Office 11, uban ang Regional Intelligence Unit ug Mati City Police Station, ang usa ka ginatuohang drug den sa Purok Marilag, Limatok Street, Barangay Central, Mati City alas 4:45 sa hapon nga usa sa mga dinakpan usa ka public school principal nga giilang si “Jay.” nga gikan sa Lupon, Davao Oriental.
Ang maong principal giingong usa sa mga bisita sa drug den atol sa operasyon.
