DAVAO CITY – Panigurado sumala pa nga dili magutman ang mga giilang Internally Displaced Person (IDP) nga gikan sa Marawi City nga anaa na nanimuyo sa dakbayan gumikan kay hatagan og trabaho ang mga nahisgutan aron padayon nila nga masustentohan ang ilang panginahanglanon.
Kahinumduman nga nagkahiusa ang ahensiya sa Department of Labor and Employment (DOLE) ug Kalilintad 911 Program aron nga tabangan ang mga bakwit nga duruha ka tuig na sab nga nanimuyo sa siyudad human ang nahitabong giyera tali sa mga tropa sa militar ug Maute terrorist group nga maoy hinungdan sa duruha ka tuig nga pagpatuman sa Martial Law.
Sumala pa kang Iza Beth Villaruel, alternative focal person for livelihood sa Dole-11, manarbaho sumala pa sulod sa 30 ka adlaw ang mga IDPs sa ilang komunidad ug makadawat ang mga nahisgutan og minimum wage nga dakong tabang sa ilang panginahanglanon.
Samtang gibutyag sab ni Col. Consolito Yecla, commander sa Task Force Davao (TFD) nga sukad gisugdan ang kalilintad 911 intervention program sa lokal nga panggamhanan, daghanan na sila og natabangan pinaagi sa paghatag og panginabuhian.
Aduna sab sumala pay uban nga mga ahensiya sa kagamhanan nga motabang sa IDPs sama na lamang sa PESO.
