DAVAO CITY – Gitambagan ang mga Dabawenyos nga naghupot ug food and medicine (FM) passes nga dili na matud pa mamahimo nga makagawas sugod sa alas sais sa gabii human nga gi-amyendahan sa city government ang curfew hours dungan sa pag-isyu sa Executive Order (EO) No. 23-A kagahapong adlawa.
Magsugod gilayon karung adlawa, Abril 7 ang revised curfew hour diin tugtan lamang nga makagawas kung adunay emerhensiya o kung moadto sa trabaho ingon man kadtong exempted nga sector o frontline offices.
Una ng gipasabot ni Davao City Mayor Inday Sara Duterte-Carpio nga ang FM passes gamiton lamang aron nga ipalit ug pagkaon, medisina o kung moadto sa hospital.
Duruha ka mga indibidwal ang tugtan sa usa ka FM passes apan dili kini mamahimong dungan nga gamiton.
Pipila sa mga gi-amyendahan sa EO, ang gikan sa resolution nga gi-isyu sa Davao Region Covid-19 Task Force.
Ang ECQ laoman nga matapos sa 11:59 sa April 19, depende kung kini malugwayan.
