Malampusong mipatuman ang Regional Civil Security Unit 11 (RCSU 11), sa koordinasyon sa Police Regional Office sa 11 (PRO 11) ug sa Davao City Police Office (DCPO), kabahin sa pagsilbi sa Order of Revocation mahitnugod sa License to Own and Possess Firearms (LTOPF) ug Firearms Registrations (FR) ni Senador Ronald Dela Rosa kagahapong adlawa( Mayo 27) 2026.
Subay sa memorandum nga gipagawas sa RCSU 11, ang revocation order opisyal nga nadawat sa yunit pinaagi sa electronic mail niadtong Mayo 26, 2026.
Human madawat kini, gilayon nga gipahibalo ni PCOL Jomar Alexis A. Yap, Chief sa RCSU 11, si Police senior GEN Leon Victor Z. Rosete, Regional Director sa PRO 11, kabahin sa implementasyon sa maong order.
Human niini, gihimo ang koordinasyon ug operational briefing uban sa mga personnel nga nalakip aron masiguro ang hustong pagsunod sa mga proseso, security measures, ug mga protocol atol sa implementasyon sa maong kalihokan.
Nakig-alayon usab sila sa Davao City Police Office ubos ni PCOL Peter B. Madria, City Director, ug sa Maa Police Station alang sa standby patrol assistance aron maseguro ang seguridad ug malinawon nga pagpatuman sa operasyon.
Ang Order of Revocation dayon nga gisilbi ug opisyal nga gidawat ni Atty. Vicente Adrian Pajaro, legal representative ni Senador Ronald “Bato” M. Dela Rosa, nga mibutyag nga iyang hisgutan ang maong butang uban sa iyang kliyente ug makigkoordinar pa sa RCSU 11 kabahin sa revocation order.
Gibutyag ni POLICE SENIOR GEN Rosete nga ang implementasyon sa pagsilbi sa maong order gihimo subay sa balaod ug sa propesyonal nga paagi.
