DAVAO CITY – Mamahimo pa gihapon nga manubag ang mga Curfew violators sa umaabot nga panahon bisan nga dili kini presohon kini tungod sa limitado nga detention facilities sa rehiyon.
Sumala pa kang Department of Interior and Local Government in Davao Region (DILG-Davao) Director Alex Roldan nga giangkon sa opisyal sa Department of Justice nga ang daghanang ihap sa mga curfew violators ang dili sumala pa maakomodar tanan sa presohan.
Una nang gibutyag sa Bureau of Jail Management and Penology sa Davao Region (BJMP-Davao) nga anaa sa 4,463 inmates ang anaa sa ilang jail facility sa milabay nga Disyembre 31, 2019 o sobra na kini sa kapasidad nga anaa lamang sa 1,191.
Sumala pa kang Mayor Sara Duterte-Carpio nga temporaryo una nga gisuspende karon ang pagpahigayon og inquest proceedings sa mga nasikop nga violators.
Apan gitataw ni Roldan nga ang subpoenas ipadala sa mga violators sa higayon nga mobalik na sa normal ang sitwasyon sa nasod sa krisis nga hatud sa Covid-19.
Kahinumduman nga gisugdan kaniadtong Marso 19 sa RTF11-Covid-19 ang curfew nga magsugod sa alas nuebe sa gabii hangtud alas singko sa buntag sa tibuok Davao Region ug magpadayon kini hangtud nga dili tapuson ang pagpailalom sa State of Public Health Emergency.
