-- ADVERTISEMENT --

Nagpagawas og pahimangno ang Department of Health (DOH) ngadto sa mga mabdos nga mag-amping batok sa grabeng kainit ug hulaw nga dala sa El Niño tungod sa posibleng epekto niini sa ilang pagmabdos.

Gipasabot sa buhatan nga ang sobra nga pagkaladlad sa grabeng kainit mahimong makapataas sa risgo sa sayong pagpanganak, pagkawala sa bata sulod sa ilang sabakan, ug uban pang seryosong komplikasyon.

Kalabot niini, gitambagan sa mga eksperto ang mga mabdos nga kanunayng moinom og igo ug limpyo nga tubig aron malikayan ang dehydration.

Girekomenda usab kanila nga magpabilin sa mga landong ug bugnaw nga lugar ug likayan kutob sa mahimo ang dugay nga pagbulad sa direktang kahayag sa adlaw.

Dugang pa sa DOH, importante ang regular nga prenatal check-up sa labing duol nga health center aron mamonitor ang kahimtang sa inahan ug sa bata sulod sa tagoangkan.

-- ADVERTISEMENT --