-- ADVERTISEMENT --

Nanawagan sa United Nations (UN) ang Ministry of Social Development sa Gaza nga mo-aksyon aron mapanalipdan ang mga sibilyan human gilusad pag-usab sa militar sa Israel ang dinagkong operasyon sa sentral nga bahin sa Gaza.

Ang apela gihimo human misugod ang Israel sa bag-ong ground operation kaniadtong Miyerkules, Nobyembre 18,2026 nga unang dinagkong operasyong militar sa sentral nga Gaza sukad napirmahan ang ceasefire agreement niadtong Oktubre 2025.

Gihulagway sa militar sa Israel ang operasyon isip “concentrated operations” sa tulo ka lugar sa sentral nga Gaza, diin tumong niini nga wagtangon ang giingong hulga sa ilang mga pwersa.

Target sa operasyon ang mga lugar duol sa Nuseirat ug Bureij refugee camps, Al-Mughraqa ug uban pang bahin sa sentral nga Gaza, diin napugos na usab ang mga residente sa pagbakwit tungod sa pag-abante sa mga sundalo ug tangke sa Israel.

Pasidan-an sa Ministry of Social Development sa Gaza nga nameligro na usab ang kaluwasan sa liboan ka sibilyan, lakip ang mga pamilyang nagpuyo sa temporaryong mga tolda human mawad-an og puy-anan.

-- ADVERTISEMENT --

Gipahayag usab sa maong ahensiya nga ang pag-atake duol sa mga lugar nga puy-an sa mga sibilyan ug evacuation centers usa ka paglapas sa international humanitarian law.

Samtang, gikondena sa Hamas ang bag-ong operasyon ug gihulagway kini isip paglapas sa ceasefire agreement nga gipasiugdahan sa Estados Unidos.

Gipasiugda usab sa grupo ang panginahanglan nga molihok ang mga nasud nga mitabang sa pagpataliwala sa kasabutan aron mapugngan ang dugang pag-atake ug pag-grabe sa krisis sa Gaza.