Patay ang usa ka giingong Malaysian drug pusher ug ang iyang Pilipinong kauban sa krimen human sila maengkwentro sa mga operatiba sa Philippine Drug Enforcement Agency (PDEA) atol sa buy-bust operation sa Tawi-Tawi.
Nahitabò ang maong operasyon niadtong Sabado sa hapon, Nobyembre 15, sa Barangay Tubig Mampallam, Bongao.
Base sa report sa PDEA, nagsugod ang pinusilay human nakabantay ang mga suspek sa presensya sa mga operatiba. Misulay kuno sila sa pag-ikyas samtang gipusil ang mga otoridad hangtod nga namatay ang duha.
Sumala kang PDEA Tawi-Tawi Provincial Officer Abraham Solon Kalim, giila ang mga namatay nga sila si Janimal Bin Hajad, usa ka Malaysian national, ug si Sansibar Amirul Amil, usa ka Pilipino.
Samdan usab ang duha ka babaye nga wala pa mailhi ang mga pagkatawo. Gidala dayon sila sa ospital aron matambalan.
Samtang, narekober sa mga operatiba sa PDEA, kauban ang mga miyembro sa Philippine Marine ug Philippine National Police (PNP), ang duha ka kilo sa gituohang methamphetamine hydrochloride o shabu nga gisulod sa duha ka pakete sa tsa ug adunay gibanabanang kantidad nga ₱13.4 milyon.
Nasakmit usab sa mga otoridad ang ubang ebidensiya sama sa armas ug usa ka motorized wooden boat nga posibleng gigamit sa mga suspek sa ilang pag-ikyas.











