-- ADVERTISEMENT --

Posibleng makatala og bag-ong rekord sa gidaghanon sa giangkat nga bugas ang Pilipinas human miabot na sa 4.49 milyones metriko tonelada ang rice imports sa nasud gikan Enero hangtod Oktubre 29, 2026.

Base sa datos sa Bureau of Plant Industry (BPI), milabaw na kini sa 4.48 milyones metriko tonelada nga naangkat niadtong 2024, panahon nga giatubang sa nasud ang epekto sa El Niño.

Milabaw na usab ang kasamtangang gidaghanon sa 3.39 milyones metriko tonelada nga kinatibuk-ang rice imports nga natala sa tibuok tuig sa 2025.

Nagpabiling nag-unang tinubdan sa giangkat nga bugas ang Vietnam nga mikabat sa 2.79 milyones metriko tonelada, gisundan sa Thailand ug Myanmar.

Gipalugwayan usab sa gobyerno ang pag-angkat og bugas isip pagpangandam sa posibleng epekto sa El Niño, diin gibanabana sa Department of Agriculture (DA) nga mahimong moabot sa lima ka milyones metriko tonelada ang kinatibuk-ang bugas nga aangkahon karong tuiga.

-- ADVERTISEMENT --