-- ADVERTISEMENT --

Gimando sa Muntinlupa City Prosecutor’s Office ang pagpagawas sa kapin 200 ka mga raliyista nga gidakop atol sa protest caravan dungan sa pagbukas sa 49th ASEAN Summit sa Pasay City.

Sa release order nga gipetsahan Nobyembre 18,2026 giingon buhatan nga wala nay basehan ang hangyo sa kapulisan nga ibalhin ang mga dinakpan ngadto sa pasilidad sa Bureau of Jail Management and Penology sa Camp Bagong Diwa, Taguig City.

Gipirmahan ang maong mando ni Senior Assistant City Prosecutor Elvin Keith Barrios ug giaprobahan ni City Prosecutor Aileen Gutierrez.

Una nang misumiter og petisyon ang National Union of People’s Lawyers alang sa pagpagawas sa mga dinakpan ug pagbawi sa mga reklamo batok kanila. Matud sa grupo, paglapas sa ilang mga katungod ang padayon nga pagdetine kanila sulod sa kapin 36 ka oras nga wala pay kaso nga gisang-at sa korte.

Gidakop ang mga raliyista niadtong Nobyembre 15 samtang gisupak nila ang planong Pax Silica initiative nga gipangulohan sa Estados Unidos ug ang pagbisita ni US President Donald Trump.

-- ADVERTISEMENT --

Gikondena usab sa Commission on Human Rights ang dinagkong pagdakop, human mitungha ang mga taho nga adunay mga menor de edad ug nasamdan nga mga demonstrador taliwala sa mga gidakop. Una usab nga naglisod ang mga abogado ug imbestigador sa komisyon sa pagsulod sa Camp Bagong Diwa.