Giawhag sa Philippine Ports Authority (PPA) ang publiko nga pahimuslan ang gipalawig nga bakasyon tungod sa ASEAN Summit pinaagi sa pagbisita sa nagkadaiyang mga destinasyon sa turismo sa nagkalain-laing bahin sa nasud.
Matod ni PPA General Manager Jay Santiago, gilauman sa ahensya ang pagdaghan sa mga pasahero sa mga pantalan tungod sa taas nga bakasyon nga molungtad hangtod Nobyembre 18, hinungdan nga gipahimutang na sa alerto ang ilang mga kawani.
Alang sa kasayoran sa mga biyahero, gilatid usab sa ahensya ang opisyal nga pamasahe sa pipila ka dagkong ruta, diin mokabat sa 600 pesos ang biyahe gikan sa Lucena paingon sa Balanacan, samtang 1,320 pesos ang pamasahe sa mga ruta gikan sa Lucena paingon sa Sibuyan ug Masbate.
Samtang, mokabat sa 600 pesos ang pamasahe gikan sa Davao paingon sa General Santos ug Zamboanga, samtang 2,900 pesos naman ang gasto sa biyahe tali sa Davao ug Manila.
Giawhag usab sa PPA ang mga pasahero nga gusto nga dad-on ang ilang kaugalingong sakyanan nga mogamit sa mga roll-on/roll-off o RORO vessel aron madala kini ngadto sa ilang destinasyon.
Gipasalig sa pamunuan sa PPA nga hugot nilang gibantayan ang kaluwasan ug kahapsay sa mga pasahero sa mga pantalan aron masiguro ang hapsay, komportable ug walay hasol nga pagbiyahe sa publiko atol sa bakasyon.
