-- ADVERTISEMENT --

Gipakusgan sa Department of Agriculture (DA) ang kampanya sa pagbakuna batok sa African Swine Fever (ASF) human makabakuna og hapit tunga sa milyon ka baboy, samtang 65 porsiyento na sa mga lugar nga naapektuhan sa maong sakit ang nakarekober.

Sumala ni Agriculture Secretary Francisco P. Tiu Laurel Jr., tumong sa maong lakang nga mabalik sa kanhing lebel ang lokal nga produksyon sa baboy sa wala pa miigo ang ASF niadtong 2019, diin mikabat sa 13 milyon ang populasyon sa baboy sa nasud.

Base sa report sa Bureau of Animal Industry (BAI), mikabat sa 499,008 ka dosis, o 99.8 porsiyento sa target nga paggamit, ang naturok gikan sa 2024 hangtod sa unang katunga sa 2026 sa pito ka probinsiya. Lakip niini ang paggamit sa AVAC ASF Live Vaccine nga gikan sa Vietnam.

Gipalig-on usab sa DA ang proteksyon sa mga komunidad pinaagi sa Community Animal Biosecurity Interventions (CABI), lakip ang paghatag og ₱49.824 milyon nga pinansyal nga ayuda sa mga apektadong mag-uuma sa walo ka rehiyon.

Bisan pa niini, nagpabiling adunay aktibong kaso sa ASF sa 236 ka barangay sa 23 ka probinsiya, samtang 716 ka lugar ang giklasipikar isip buffer zones.

-- ADVERTISEMENT --

Tungod niini, padayon ang panawagan sa DA sa mga mag-uuma ug mga hingtungdang sektor nga hugtan ang pagpatuman sa biosecurity measures aron mapugngan ang dugang pagtakod sa sakit.