-- ADVERTISEMENT --

Nakig-alayon na ang Department of Health (DOH) aron makahimo og komprehensibong PhilHealth benefit package nga gitagana alang sa mga kababayen-an ug kabatan-onang nakasinati og pagpang-abuso o Violence Against Women and Children (VAWC).

Sumala ni Health Secretary Edwin Mercado, gitinguha sa ahensya nga masugdan ug mapatuman ang maong programa sa kataposang bahin sa 2027 o sa unang bahin sa 2028.

Sakop sa gisugyot nga Z Benefit Package ang padayong serbisyo sama sa psychosocial support ug psychological care alang sa mga biktima.

Lakip usab niini ang mga gikinahanglang follow-up services nga ipadayon bisan nakagawas na sa ospital ang pasyente.

Kabahin kini sa mas halapad nga health benefit roadmap sa DOH nga naghatag og prayoridad sa mga kondisyon nga gibase sa ebidensya, gasto sa pagtambal, gidaghanon sa mga kaso ug hulga sa kinabuhi.

-- ADVERTISEMENT --

Giklaro ni Mercado nga lahi kini nga programa ug dili kabahin sa developmental disability benefit package nga gilaumang ilusad sa kataposang quarter sa 2026.