DAVAO CITY – Nailhan na ang mga biktima sa nahitabong aksidente sa may Bankerohan, Pichon Street, ning dakbayan nga gikalambigitan sa usa ka miltary vehicle sa Task Force Davao nga gimanehoan sa usa ka lalaki nga gikatuhoang mentally challenged, bandang ala-5:30 sa buntag, adlawng Dominggo, bisperas sa pasko.
Subay sa taho sa San Pedro PNP, giila ang mga nakabsan sa kinabuhi nga sila Jamie Lopez Cole, 63-anyos, taga Barangay Cabantian; ug Rocel Luna Haspe, 34-anyos, taga Purok 15 Green St. Spring Village, Barangay Maa, ning dakbayan.
Samtang samaron sab sila Teresita Pilapil Tangaro, 45-anyos, taga Piapi Boulevard, Michael Baldoman Maghuyop, 44-anyos, taga Barangay Mandug ug Mae Antoneth Anticamara, 20-anyos, taga Purok 11 Sto. Nino, Barangay 76-A Bucana.
Nasayran nga naka-parking lamang ang nakaandar pa nga KM450 military truck nga dunay plate number SJE-281 nga ginaogan sa drayber nga si Private First Class Patrick Trumata aron lamang mangihi sulod sa CR sa public market.
Apan sa wa damha, kalit lamang nga nipuli ug nakalingkod sa driver seat ang usa ka lalaki nga nailhan nga si Cre-ne-nandy Rodriguez Cadiente, 44 anyos, residente sa Purok 12 St. John, Bucana ug gimaneho ang truck.
Sumala pa, gibilin nga nakaandar ang sakyanan ug anaa sa sulod ang susi niini pagbiya sa drayer sa military truck.
Nakaligis sab ang suspek og duha ka motorsiklo ug usa ka SUV nga nakapark sa maong dapit.
Nasikop sab gilayon ang suspek ug gikustodiya na kini sa may San Pedro PNP.
Sa dihang nakahinabi sa Bombo Radyo Davao ang suspek nga si Cadiente, tataw niini ang walay tarong nga pag-han ay sa iyang mga pahayag gumikan sa daw lango kini sa gisinghot nga solvent o wala lamang kini sa hustong panghunahuna.
Apan wa magdugay, giangkon sa suspek ang iyang sala.
Sumala pa sa suspek nga nabuhat niya kini human nga nag-away ug nakigbulag ang uyab sa suspek.
Ginasuta pa ning kasamtangan sa kapulisan ang estado sa pang-isip sa suspek ug ang iyang mamahimong tulubagon sa maong insidente, lakip na ang kasong reckless imprudence resulting in homicide and damage to properties.
