Mipadayag og komentaryo si Davao City Mayor Sebastian “Baste” Duterte mahitungod sa giingong warrant of arrest sa International Criminal Court (ICC) batok kang Senador Ronald “Bato” dela Rosa.
Sa iyang pulong sa “Rage Coalition” event sa Mindanao niadtong Sabado, Mayo 23, miingon si Baste Duterte nga medyo nasubo siya sa posibilidad nga maaresto si Sen. Bato dela Rosa ug madala sa The Hague, apan sa laing bahin miingon usab siya nga medyo malipay siya kay posibleng adunay kauban ang iyang amahan nga si kanhing Presidente Rodrigo Duterte nga anaa karon sa ICC detention facility ug nag-atubang og kaso nga crimes against humanity.
Matud pa ni Mayor Baste Duterte: “Medyo nasubo ko… pero sa tinuod lang, medyo nalipay pud ko kay duna nay kauban akong amahan didto kung mahitabo. Bad joke na.”
Lakip sa iyang pahayag, si Sen. Dela Rosa nga nailhan isip usa sa mga nangunang nagpatuman sa kontrobersyal nga kampanya kontra droga niadtong administrasyong Duterte, sa dihang siya pa ang hepe sa Philippine National Police (PNP).
Dugang pa niini, sa maong tigum, gibatikos usab ni Baste Duterte ang kasamtangang administrasyon ni Presidente Ferdinand Marcos Jr., ug miingon nga dili siya interesado makigtambayayong sa gobyerno.
Sa pagkakaron, sumala pa sa alkalde, nagkagrabe pa ang kahimtang sa katawhan ug daw gina-target ang mga kritiko sa administrasyon.
Lakip sa kasaysayan sa politika, ang Duterte ug Marcos camps nga kaniadto nag-alyansa sa 2022 eleksyon—kung diin magkauban si Marcos ug VP Sara Duterte—apan sa kasamtangan, nabungkag kini tungod sa mga politikal nga panagbangi.
