Giapil sa supplemental complaint nga gisumite sa Office of the Ombudsman si kanhing DBM Secretary Amenah Pangandaman may kalabutan sa giingong iligal nga pagbalhin sa sobra nga pondo sa Philippine Health Insurance Corporation (PhilHealth) ug Philippine Deposit Insurance Corporation (PDIC) ngadto sa national treasury.
Ang reklamo gisang-at ni Tony Leachon diin giakusahan si Pangandaman og technical malversation, graft ug uban pang administratibong kaso.
Subay sa reklamo, giingong dapat maapil si Pangandaman isip respondent tungod kay posibleng adunay iyang partisipasyon sa pag-apruba, pagpatuman o pagtugot sa fund transfer mechanism atol sa iyang termino isip kalihim sa Department of Budget and Management (DBM).
Lakip sa gihisgutan sa reklamo ang mga Special Allotment Release Orders o SAROs ug Notices of Cash Allocation o NCAs nga giingong kabahin sa implementasyon sa kontrobersyal nga fund transfer.
Dugang pa niini, giingon usab sa reklamo nga ang pag-apil kang Pangandaman adunay kalabutan sa giingong coordinated governmental action sa pagbalhin sa maong mga pondo.
Nahinumduman nga niadtong Disyembre sa miaging tuig, gimando sa Supreme Court of the Philippines ang pagbalik sa ₱60 bilyong sobra nga pondo sa PhilHealth pinaagi sa 2026 General Appropriations Act.
Sa 136-pahinang desisyon sa SC En Banc, gideklarang invalid ang Special Provision 1(d), Chapter XLIII sa 2024 GAA ug Finance Circular No. 003-2024 lakip na ang pagbalhin sa ₱60 bilyon tungod sa giingong grave abuse of discretion.
