Gisugyot sa Marcos administration ang ₱643.95-bilyong budget alang sa Department of Public Works and Highways (DPWH) sa 2027, mas taas og ₱113.05 bilyon o 21.29% kumpara sa ₱530.90-bilyong budget niini karong 2026.
Sumala sa Department of Budget and Management (DBM), dakong bahin sa dugang nga pondo igahin sa padayong locally funded ug foreign-assisted Infrastructure Flagship Projects sa nagkalain-laing bahin sa Pilipinas.
Lakip sa mga nag-unang proyekto nga giplanong pondohan ang Laguna Lakeshore Road Network, Bataan-Cavite Interlink Bridge, Davao City Bypass, Cebu-Mactan Bridge and Coastal Road, ug Pasig-Marikina River Channel Improvement Project Phase IV.
Ang mas taas nga infrastructure spending gilauman nga makatabang sa pagmugna og dugang trabaho ug pagpaubos sa logistics ug travel costs.
Mapalambo niini ang connectivity tali sa mga lugar ug masuportahan ang padayong pagtubo sa ekonomiya pinaagi sa pagpalapad ug pagpaayo sa mga dagkong infrastructure projects.
Sa pagkakaron, proposal pa lamang ang maong 2027 DPWH budget ug kinahanglan pa kini moagi sa proseso sa pag-apruba sa national budget.
