Hugot nga gikondena ni House Ad Hoc Committee on Marawi Rehabilitation and Victims Compensation Chairman Zia Alonto Adiong, Representante sa Lanao del Sur, ang pagdaghan sa mga Filipino vloggers nga misunod sa pagpamakak nga gipakatag sa China sa isyu sa West Philippine Sea.
Matod pa sa magbabalaod, ang mga nahisgutang social media personalities ang mga traydor ug dili angay tawagong mga Pilipino.
Gipahayag pa ni Adiong, nakalimtan sa mga pro-China vloggers nga ang mga Filipino ang naapektuhan sa agresyon ug pagpang-ipit sa Beijing sa West Philippine Sea.
Nanawagan usab kini sa mga awtoridad nga patubagon ang mga Filipino bloggers nga pro-China sa ilahang gipanghimo.
Sa gipahigayong pagdungog sa House Tri-Com, gipahayag sa mga opisyal sa Meta nga kanhi Facebook, gi-aksyunan na nila ang post sa blogger nga si Mark Lopez nga sayop ang inpormasyon nga gipakatag niini.
Sa nahisgutang post, migamit ang Pilipinas ug water cannons batok sa China Coast Guard sa West Philippine Sea.
Si Lopez ang usa sa upat ka bloghgers nga na-contempt ug gipa-detine sa Tri-Com sa kamara sulod sa napulo ka adlaw.
