DAVAO CITY – Abli sumala pa ang Land Transportation Franchising and Regulatory Board (LTFRB)-Davao sa posibilidad sa sugyot sa dakbayan sa Davao nga gamiton na ang kasamtangang bypass ug access roads isip bag-ong rota sa mga sakyanan.
Sumala pa kang LTFRB-Davao Director Armand Dioso nga bisan wala pa sila nakadawat sa maong proposal nga gitun-an pa ni City Council committee chair on franchises and public utilities Councilor Dante Apostol, hatagan sumala pa nila ang lokal nga panggamhanan og kagawasan sa pagdugang og bag-ong rota.
Gitataw sab sa LTFRB nga kung masapinal na ang maong pagtuon, mag-abli sila og selection process alang sa operators.
Una ng gibutyag ni Apostol nga nagplano ang siyudad sa paggamit sa nahisgutan nga dalan aron nga makunhuran ang paghuot sa mga rota sa sakyanan nga nakasinate og dyutay nga traffic ilabi na panahon sa peak hours.
Moduso sumala pa ang komitiba og resolusyon nga mohangyo sa City Transport and Traffic Management Office nga magpahigayon og pagtuon sa pag-abli og rota sa mga bypass roads ug uban pang ancillary roads aron nga ma-declog ang kasamtangan nga mga main roads.
Pipila sumala pa sa nahisgutan nga mga bypass roads ang gilangkuban sa Bunawan, Tibungco, Ilang ug Panacan.
Maayo sumala pa ang maong sugyot ilabi na karon nga nangandam na sab ang siyudad sa pagpatuman sa High Priority Bus System (HPBS).
Kahinumduman nga ang HPBS usa sa mga initial plans ni Mayor Inday Sara Duterte-Carpio aron nga masolusyonan ang nagkagrabe nga suliran sa trapiko sa siyudad.
