DAVAO CITY – Nagkatapok ang mga militante alang sa gipahigayong lihok-protesta atol sa nahitabong State of the Nation Address ni Pangulong Ferdinand Marcos Jr. kagahapong adlawa.
Nagkadaiyang mga grupo ang misalmot sa maong kalihukan nga gihimo sa Freedom Park ning dakbayan sa Davao.
Gihangyo sa mga progresibong grupo ngadto kang PBBM ang pagtuman niya sa mga saad nga iyang gikabutyag sa SONA sama na lamang
sa paghatag og kasulbaran sa pagmahal sa nag-unang mga palaliton, pagsaka sa presyo sa lana, pagpahunong sa contractualization, pagpausbaw sa national minimum wage ug pagpatanggal sa regionalized minimum wage, pag-prioritize sa agrarian reforms alang sa mga mag-uuma ug pagpakusog sa sektor pang-agrikultura sa nasud ingon man ang pagbalik sa face-to face classes sa umaabot nga school year.
Gikanayon ni John Paul Dizon, Secretary GAeneral sa Kilusang Mayo Uno-Southern Mindanao, nga ginapasibaw nila ang mulo sa katawhang Pilipino ug ang gilaumang pagtuman sa mga nahibiling mga saad sa miaging administrasyon ngadto sa bag-ong pangulo sa nasud.
Padayon sab ang mga militante sa pakigbisog alang sa katungod sa katawhan ug ang pagduso sa mga long-term nga solusyon sa dagkong mga problema sa nasud.
Ang maong lihok protesta ang gitawag nga People’s SONA 2022 diin gisalmutan kini sa singkwenta ka mga grupo sama sa Bayan Muna Partylist, Anakbayan, Bagong Alyansang Makabayan, Transmission Piston, ACT Davao, Kabataan Partylist ug Gabriela.
Via || LJ Florendo
