DAVAO CITY- Nagpaguwa na og pamahayag ang legal counsel sa Kingdom of Jesus Christ (KOJC) kalabot sa gitanyag nga mga reward sa DILG sa kinsa mang makatudlo sa nahimutangan ni Pastor Apollo Quiboloy ug sa lima pa niining kaubanan.
Sumala pa ni Israelito Torreon, Legal Counsel sa KOJC, nga girespeto niini ang lakang sa Administrasyong Marcos apan dili gayud malikayan nga ilang ma-obserbahan ang matud pa “continuous obsession” sa Marcos Administration kay Pastor Apollo Quiboloy.
Kini gumikan inay molihok ang Administrasyong Marcos sa Motion for Reconsideration nga pwedeng ma-avail sa Pastor sa DOJ, mas ginapili niining matabunan ang mga nag-unang problema nga ginaka-atubang sa Pilipinas susama na lamang sa nagkagrabeng kahimtang sa ekonomiya, padayong pagsaka sa presyo sa mga nag-unang palaliton, kahimtang sa West Philippine Sea, ug uban pang angay mas tagaan og pagtagad.
Sumala ni Torreon nga imbes mag-mapasalamot ang KOJC sa ginahimo sa kasamtangang administrasyon, mas pilion nila nga dili na lamang.
Kahinumduman nga gipahibalo sa DILG kagahapong adlawa ang gitanyag nga ₱10,000,000 nga reward money sa kinsa mang makatudlo sa nahimutangan ni Pastor Apollo Quiboloy, kalakip na ang pagtanyag usab og tinag ₱1,000,000 sa kinsa mang makatabang aron makit-an ang lima pa niining kaubanan nga sila Sylvia Cemañes, Jackielyn Roy, Cresente Canada, Paulene Canada, ug Ingrid Canada.
Ning kasamtangan, wala pay nipadayag og impormasyon kabahin sa impormasyon sa mga nahisgutan.
