Nagpabilin nga ischemic heart diseases ang pinakuna nga hinungdan sa pagkamatay sa Pilipinas niadtong 2025, sumala sa provisional report sa Philippine Statistics Authority (PSA).
Base sa taho sa PSA nga gipagawas karong semanaha, miabot sa 111,896 ang mga kaso sa pagkamatay tungod sa ischemic heart diseases gikan Enero hangtod Nobyembre 2025.
Katumbas kini sa 19.7% sa kinatibuk-ang ihap sa mga namatay sa nasod.
Sumala sa United States National Institutes of Health (NIH), ang ischemic heart disease usa ka kondisyon diin kulang ang suplay sa dugo sa kalamnan sa kasingkasing, hinungdan sa kakulang sa oksiheno.
Kasagaran kini tungod sa pagtipon sa fatty plaques sa coronary arteries nga makababag sa agianan sa dugo.
Ikaduha sa lista ang neoplasms nga adunay 64,864 ka kamatayon o 11.4%.
Sumala sa NIH, kini nagtumong sa abnormal nga pagdaghan sa mga selula nga mahimong bukol o tumor kung dili mapugngan sa husto nga panahon.
Ikatulo ang cerebrovascular diseases nga adunay 55,756 ka kaso o 9.8% sa total deaths.
Sumala sa American Association of Neurological Surgeons, naglakip kini sa stroke, pagnipis o pagbara sa mga ugat sa utok, aneurysm, ug uban pang vascular abnormalities.
Gipahibalo sa PSA nga pareho gihapon ang top 3 causes of death kumpara sa datos sa 2024 sa samang panahon.
Ikaupat ang pneumonia nga adunay 38,607 ka kaso (6.8%), samtang ikalima ang diabetes mellitus nga adunay 34,611 ka kamatayon (6.1%).
Sumala sa World Health Organization (WHO), ang pneumonia usa ka acute respiratory infection nga tungod sa virus o bacteria, samtang ang diabetes mellitus usa ka chronic metabolic disease nga nagpasabot og taas nga blood sugar level.
Gipatin-aw sa PSA nga ang datos naglangkob lamang sa mga kamatayon gikan Enero hangtod Nobyembre 2025 base sa mga report nga naproseso hangtod Marso 31, 2026, ug posible pa kini ma-update sa sunod nga opisyal nga pagpagawas sa Enero 2027.
